KALIBO, Aklan—Mabahoe nga kawad-an sa basketball ro hinali nga pagkamatay it NBA superstar nga si Kobe Bryant.
Suno kay Lorger Pronton Geronimo, tubong Aklan ag presenteng naga-istar sa Montreal, Quebec, Canada nga sambilog imaw sa mga legends ag ginatang-ea it mga basketball players sa bilog nga kalibutan.
Maskin sigon ro mga Canadians hay nasubuan sa anang pagkamatay.
Sa kamatuoran suno kana sa anang kompaniya nga ginasudlan hay naghaead anay sanda it makadali nga segundos it paghipos agud nga makapangamuyo antes nga umpisahan ro trabaho ko adlaw nga nabalitaan ro pagkamatay ni Kobe.
Gindugang pa ni Lorger nga magkapareho ro batasan ukon ugali ni Bryant kay pambansang kamao Manny Pacquiao bangud nga parehong bukon it bugaeon ro mga raya sa andang hampang.
Mag-eowas kara, pareho man nanda nga ginataw-an it importansiya ro disiplina, hard work ag dedikasyon rason nga nagmadinaeag-on sa andang kanya-kanyang patag.
Gindayaw pa sigon si Kobe bangud sa pagiging dedikado sa anang pamilya.
Ginagamit ro anang talento ag kasikatan agud nga magbulig ag magserbing inspirasyon sa komunidad.
