KALIBO, Aklan–Nagpanindugan si Engr. Marlon Velez, Chief it Land Transportation Office (LTO)-Kalibo nga hugut nga ginabawae sa idaeom it Republic Act 4136 ro pagkarga it pasahero it mga habal-habal ukon motorsiklo nga may bayad.
Makabig sigon nga ilegal ro operasyon samtang owa pa na-amyendahan ro naga-eksister nga laye.
Reaksyon raya it opisyal sa plano it Sangguniang Bayan it Malay nga pagbaeay it sangka ordinansa para himuon nga legal ukon lehitimo ro pagbiyahe it mga habal-habal sa isla it Boracay.
Manami sigon ro intensyon it mga miyembro it konseho apang indi makasarang ro sangka Municipal Ordinance sa gahum it aprubadong National Law.
Agud nga maging legal ro operasyon, ginsuhestiyon ni Engr. Velez nga dapat ipaagi raya sa legislation kung siin kinahang-ean nga may mag-lobby kara sa kongreso.
Dugang pa kara nga ginapasugtan eamang ro operayson it mga motorcycle rider partikular sa pagdeliver it mga parcel ukon pagkaon ag bukon it para magkarga it pasahero.
Nasayuran nga indi man makatao it local franchise sa mga motorsiklo ro lokal nga gobyerno bangud owa pa sanda nataw-an it otoridad nga mag-isyu kara.
