Kalibo Aklan ———-Mabahoe nga paealigban para sa mga apektadong residente kung ham-an nga nagkaearumpag ro andang eugta kasunod it natabo nga landslide ko Huwebes nga adlaw matapos ro sigidas nga pagbubo it uean tuga it naeksperyensiyahan nga Low Pressure Area (LPA) sa Sitio Agpalina, Barangay Badiangan, Banga.
Suno sa tag-iya it eugta nga si Generosa Raval ag residente it nasambitan nga lugar nga owa sanda it makit-an nga rason agud nga maagyan sanda it landslide bangud owa gid sanda nagaputoe maskin sang puno it andang mga tanom nga kahoy.
Ginatantiya nga kapin sa 50 ka mga takad nga puno it niyog ro natumba bangud sa natabong landslide.
Samtang may mga puno it Santoe, Tipu-oe Gmelina ag Mangosteen tree man ro nagkaeatumba ag indi eun haeos makit-an matapos nga matambakan it eutay ag madamoe nga eugta.
Samtang aminado man si Raval nga bakili ro ibang parte it andang eugta ag may mga nakit-an pa sandang crack sa ibang parte kara nga posibleng marumpag man sa pilang mga inadlaw.
Bangud kara hay nahadlok eun sigon sandang magbalik sa nasambitan nga lugar ag anda pang paga-isipan kung uman nga magtanom it mga puno idto.
Samtang nagaeaum man sanda nga makabatun it ayuda maghalin sa Philippine Coconut Authority ukon PCA.
Nasayuran nga ro andang eugta nga rehistrado sa PCA ro sangka ahensiya it gobyerno sa idaeum it Department of Agriculture (DA) nga nagatuyong magbulig para sa pag-develop sa industriya it niyog ag palm oil.
