KALIBO, Aklan—Nagapadayon ro imbestigasyon it Bureau of Fire Protection (BFP)-Buruanga may kaangtanan sa nasunog nga panimaeay sa Brgy. Tigum, Buruanga.
Suno kay FO1 Francis Tatoy it BFP-Buruanga, totally damage ro nasambitang baeay nga human sa mixed materials ag ginapanag-iyahan ni Mary Jane Lomugdang, 38, ag residente it nasambit nga lugar matapos nga gin-eamon it kaeayo sa haeos daywang oras nga sunog.
Base sigon sa andang inisyal nga imbestigasyon, nag-umpisa ro sunog bandang alas-6:30 it gabi-i kon siin pag-abot nanda sa area hay haeos naputos eon it kaeayo ro residente ni Lomugdang.
Ginpahayag dugang nga uwa it linya it kuryente sa nasambitang baeay ag uwa man sigon raya it tawo kat matabo ro insidente.
Suno pa kay FO1 Tatoy, nabudlayan sanda sa pagtapna it kaeayo ag ginkinahang-ean pa nanda ro bulig it BFP-Malay kon siin insigida man sanda nga nakaresponde sa lugar.
Sa makaron suno kana hay padayon pa ro andang pag-imbestiga sa lugar agud nga maasess ro kabilugan nga halit nga gin-aywanan it nasambitang sunog.
