KALIBO, Aklan — Eubos makaron nga ginakabaeak-an ro pagnubo it numero it mga fruit bats ukon mga kabog sa isla it Boracay.
Sa interview it Bombo Radyo Kalibo kay Julia Lervik, presidente it Friends of the Flying Foxes (FFF), eubos sigon sanda nga nagakabaeaka sa amat-amat nga pag sangkiri it mga kabog nga ginaeakipan it flying foxes, sangka klase it fruit bat sa isla.
Ginpahayag man kara nga pinakamabahoe nga numero it mga flying foxes sa isla hay kaeabanagn nakikita kung summer.
Ro mga raya sigon hay nagabulig sa pollenation ag sa pag-amlig it aton nga palibot ag mga kagueangan.
Mabahoe sigon ro role it mga kabog sa regeneration it mga kakahuyan ag sa pag preserba it fast-dwindling forest cover.
Pahayag dugang ni Lervik, kapin sa 95 percent it forest regrowth sa mga maeawig nga keugtaan hay magalin sa mga busoe nga ginahueog it nasambitan nga mga kabog samtang sanda hay naga-eupad ag nagalibot.
Nagakatueog eamang sigon raya kung adlaw ag nagalibot kung magdueom eon sa isla ag sa bilog nga Panay island.
Nagabitay sa mga matag-as nga kahoy sa lowland forests ro mga flying foxes ag naga-istar sa sangka colony.
Base sa andang datos, ku Abril 2017 nakalista sanda it 2425 nga mga kabog ag ku Marso 2018 hay kapin sa 1608.
Apang nasubuan sanda sa makaron nga ku nagtaliwan nga Marso 14, kapin sa 78 eon lang ro andang nailista.
Posible nga bangod raya sa mga ginapatigayon nga konstruksyon sa isla kung siin natuewag ro andang mga ilistaran.
May kaangtanan kara, nagapanawagan ro nasambitan nga grupo sa gobyerno nga buligan sanda nga masayran kung siin nag-adto ro mga kabog nga dating naga-istar sa isla it Boracay.
