“Sweldo pataasan, presyo panabaan”.
Raya ro ginasinggitan it mga trabahador.
Raya hay nagapamatuod nga owa sa gihapon naangkon ro matuod nga pagbag-o.
Maabu nga dag-on eon ro nagtaliwan ag administrasyong nag-agi, ro mga trabahante hay naaywan sa gihapon.
Manabang pasweldo nga benepisyo ag owa it kasiguraduhan nga trabaho.
Sitwasyong mas ginpa-grabe it pandemya tuga it COVID-19.
Kadungan it lockdown, may mga kompanyang nagsarado, maabung trabahador ro naduea-an it pangabuhian.
Makaron nga amat amat eon nga nagabangon, natabu man ro waea-tuo nga pagtaas sa presyo it mga baeak-eon ag serbisyo.
Sa baylo nga magsurender, nagapabilin nga mabakod ro mga Pinoy.
Gina-abtikan pa gid ro diskarte sa pagtipid, mas ginpaeapad ro ikasarang para sa ibang hilimuon ag eabaw sa tanan, nagapabilin nga positibo ro panan-awan sa kabuhi ag ginpabaskog pa ro pagsalig sa Diyos.
Indi matupungan ro dugo ag hueas nga ginahaead it kada trabahador sa nasyon ag maskin siin man nga parte it kalibutan.
Ag makaron nga dag-on, uman nga magiging makasaysayan ro Mayo 9.
Kaibahan ro mga trabahador, magatau kita it pagsalig sa mga lider ag opisyal nga magapanguna sa pagbangon ag pag-umwad it atong nasyon.
Magpangamuyo ag magsalig kita nga magamadinaeag-on ro atong pagboto.
Ro atong pagapili-on hay ro may ikasarang, kaaeam ag konsensiya sa pagpadaeagan it gobyerno.
Kabay nga ro masunod nga pangueo, bise presidente, mga senador, kongresista ag representante sa lokal hay naga angkon man it mga kinaiya nga kapareho it matuod nga trabahador.
Haum nga magserbisyo it bilog, tampad ag may kahadlok sa Diyos.
Saludo kita sa kada trabahador nga owa it kagaoyan kundi nga mas pang nagasukoe ag naga-amot sa nasyon.
