Nagpaandam si US Secretary of State Marco Rubio nga magiging peligroso nga precedent kun pagapasugtan nga kontrolon it Iran ro pag-agi it mga barko sa Strait of Hormuz, bangud nga posible raya nga mauman sa ibang parte it kalibutan kaibahan ro Southeast Asia.
Sa pueong it ASEAN Foreign Ministers, ginpahayag ni Rubio nga owa it kinamatarung ro Iran nga kontrolon ro importanteng international waterway ag magpanukot ukon magpamaeag sa mga barkong naga-agi kara.
Nagpahayag man it eubus nga pagkabaeaka ro mga foreign minister it ASEAN sa naga-grabeng tensyon sa tunga it US ag Iran ag nagpanawagang punduhon eon ro bakbakan. Ginpamilit man nanda ro eowas ag dere-deretso nga pag-eayag sa Strait of Hormuz bangud nga importante raya sa negosyo, suplay it enerhiya ag pagkaon.
Ginpahayag pa ni Rubio nga haum nga makipagbueuligan ro US sa ASEAN agud nga masabat ro posibleng epekto it bakbakan sa suplay it enerhiya ag presyo it langis.
Antes ro pueong, nakipag-meeting man si Rubio kay Foreign Affairs Secretary Ma. Theresa Lazaro ag gindayaw ro Pilipinas sa madinaeag-on nga pag-host it ASEAN meetings.
