KALIBO, Aklan – – – Sigidas makaron ro pagkutkot it Malay Municipal Waste Water Management Council ro drainage sa isla it Boracay para sa pag-inspeksyon ag pagtumod sa mga ilegal nga naka-konekta nga mga hotel ag resort owners.
Suno kay Rowen Aguirre, it Office of the Mayor nga tuyo it nasambit nga tikang nga masayuran ro estado it mga drainage system sa isla kamana man ro mga illegal connector nga nagapilak it wastewater.
Sangka establisimento sigon ro nakitaan it pag-eabag matapos nga magpilak it wastewater halin sa andang kusina.
Mabuhay eon sigon raya nga gina-tutukan it LGU-malay nga ginapadayun ag ginpabaskog makaron.
Sa oras nga mapamatud-an nga nagkasaea, paga-isyuhan it citation ticket ro mga violators angot sa pag-eabag sa sanitation laws ag paga-usisaon kon naka-konekta sa sewage line.
Mag-eowas kara hay paga-utdon man nanda ro mga illegal connections.
Sa pihak nga parte, padayun ro andang validation sa mga nag-eabag sa 25+5 meter easement partikular ro mga na-isyuhan dati it bayolasyon.
Paga-usisaon nanda kon naka-comply ro mga raya ukon owa.
Nag-apela man imaw sa mga resort owners nga magpatigayon it self-demolition ro mga owa naka-sunod sa kasuguan.
