KALIBO, Aklan—Nagapabilin nga pahirapan ro paglimpyo sa masobra 200 hectares it mangrove ag sea grass sa Caluya, Antique nga apektado it oil spill maghalin sa nag-eogdang nga barkong MT Princess Empress sa Naujan, Oriental Mindoro.
Suno kay Mr. Broderick Gayona-Train, head it Provincial Disaster Risk Reduction Management Office ukon PDRRMO-Antique nga raya sa makaron ro andang sambilog sa mga ginapukusan nga limpyuhan kaibahan ro Philippine Coast Guard ag lokal nga gobyerno.
Ginpaathag nana nga ibang klase ro industrial fuel rason nga nabudlayan sanda nga maglimpyo kon sa siin nakit-an eon man ro kabilugang halit it tumagas nga langis nga nagresulta it milyon-milyon pesos nga danyos ag kalugihan sa LGU, negosyante ag maging sa pangabuhian it mga residente.
Angot kara, ginaeauman nanda nga may eksperto man nga magaadto sa andang lugar agud nga mausisa ro andang presenteng sitwasyon ag magiyahan sanda sa mga dapat pa nandang obrahon.
Sa makaron suno kay Train hay padayon nga naga-eksister ro executive order ni Caluya mayor Rigil Kent Lim kon sa siin ginabawaean pa ro mga mangingisda nga magpaeaot eabi eon sa kaeawran nga apektado it oil spill.
Tayuyon man ro mga food pack assistance sa mga pumueoyo ag ro cash for work bilang alternatibo sa temporaryong pagkaduea it andang pangabuhian.
