KALIBO, Aklan—Ginakabaeak-an makaron it mga pumueoyo nga posibleng magmahae pa gid ro presyo it bugas sa tunga it naeksperyensyahan nga paeag it El Niño bangud sa sangkiri nga patubas.
Suno kay Elmer Forro, secretary general it Bayan Panay nga ro probinsya it Iloilo nga sambilog sa ginakabig nga sentro it panguma sa Western Visayas hay nakaeksperyensya it kawad-an it tubi kon sa siin haeos tanan nga mangunguma hay apektado.
Uwa sigon haeos it naani nga paeay sa second cropping ag ro mga naghingabot para sa third cropping rason nga ginatan-aw makaron nga posibleng magkueang ro supply it paeay sa rehiyon nga magaresulta sa pagtaas sa presyo it bugas.
Ginpahayag dugang ni Forro nga bukon it bastante ro ginahimo nga tikang it gobyerno agud nga masuk-ean ro El Niño nga nagaumpisa nga magpanaeasa sa bilog nga Western Visayas.
Angot kara, nag-apela imaw sa gobyerno nga padasigon ro mga ginahimo nga intervention para masalbar ro sektor it agrikultura ag inde mauli sa kagutuman bangud sa kawad-an it pagkaon nga maihatnon sa lamesa it kada pamilya.
