Pagpanaba sa presyo it mga baeak-eon ag ro pagtaas it sweldo it mga trabahador ro gusto nga patutukan it mas maabu nga mga Pinoy sa administrasyon ni Pangueong Ferdinand Marcos Jr.
Raya hay resulta it ginpatigayon nga June 24 hasta 27 survey it Pulse Asia.
Base sa ginpaguwa nga survey results sa mga adult nga Pinoy, ginasugid nga 57% sa mga raya ro naghambae nga dapat nga maaksiyunan it gobyerno nga mapanaba ro presyo eabi eon ro mga nagapangunang baeak-eon.
Kapin sa 45% man sa ginpangutana sa survey ro nagpahayag nga kinahangean eon nga pataasan ro sweldo it mga trabahador.
Nailista ko nagtaliwan nga hunyo ro mataas nga 6.1 percent nga inflation rate nga ginasugid nga pinakamataas umpisa ko Okubre 2018.
Raya ro mga concern eabi eon it mga ordinaryong Pinoy nga kunta suno kanda hay insigidang masolusyunan it presenteng administrasyon.
Maskin nga pilang adlaw pa eamang nga nakapungko ro bag-ong administrasyon, apang nagaeaum ro maabung Pinoy nga magabag-o ro daeagan it andang kabuhi.
Kun paga-isipon, maskin nga owa pa ro resulta it makarondaya nga survey, nauna eon nga nagpahayag it concern kara si PBBM.
Gintalakay man raya it pangueo sa anang gabinete partikular sa anang economic team.
Sa anang unang Cabinet meeting, ro pagpabaskog sa ekonomiya ro sambilog sa ginapatutukan it Pangueo, kamana man ro pagsabat ukon pag-usoy it pamaagi para sa ginasugid nga posibleng food crisis.
Nagaeum man ro maabu nga mga Pinoy nga mataw-an it atensyon it Pangueo ro andang hinyu ag matalakay man raya sa anang nagahilapit nga SONA.
