Ginkalipay it mga motorista partikular it mga tricycle drivers ro uman nga pagnaba sa presyo it produktong petrolyo epektibo makaron nga adlaw it Martes.
Suno sa tricycle driver nga si Eric Dela Cruz, maskin sangkiri ro ginnaba sa presyo it gasolina hay makabulig eon kanda raya partikular makaron nga mahina ro andang kita sa adlaw adlaw nga pagbyahe.
Inde pa man sigon nanda eubusang mabatyagan ro epekto it sunod-sunod nga pagnaba sa presyo it petrolyo apang ginakalipay nanda ro nasambit nga tikang it mga kompaniya it langis bangud nga sanda ro unang makabenepisyo kara.
Hinyo eamang nanda nga kunta magdire-diretso eon ro rollback bangud nga kon makabalik sa dating presyuhanay hay posibleng maghagan hagan man ro andang paeas-anon nga kalisod sa andang pagpangita.
Pag-abot suno kana sa pamasahe it mga commuters hay nagapabilin sa P10 hasta it P15 pesos ro andang panueoktan depende sa kaeayuon it ginapanaugan it pasahero bangud nga raya ro ginkasugtanan sa andang asosasyon.
