Kalibo Aklan ———-Gin-umpisahan eon sa probinsiya it Aklan ko Enero 31 ro pagpa-rehistro sa mga unga nga naga-edad it lima hasta onse anyos agud nga mabakunahan kontra sa coronavirus disease 2019 ukon COVID-19.
Angot kara, nagpanawagan si J-Lorenz Dionesio, vaccination manager it Provincial Health Office sa mga ginikanan ag guardians nga ipa-rehistro ro andang mga unga sa registration link nga “tinyURL.com/aklanresbakunakids” agud nga makabaton it libreng bakuna.
Pwede man sigon nga bisitahan ro andang facebook page nga Provincial Health Office Aklan .
Pinaagi sa nasambit nga registration link hay pwedeng sabtan ag itau ro mga ginapangayo nga impormasyon ukon detalye it mga igaparehistrong inunga.
Pagkatapos nga mairehistro hay dapat nga maghueat it text message agud nga masayuran ro oras, adlaw ag lugar it bakuna it unga .
Ginpasiguro kara nga eowas ag epektibo ro Pfizer nga bakuna nga igaturok nga gin-obra para sa mga unga nga may manaba nga dosage kumpara sa pedia ag adult .
Gindugang pa ni Dionesio nga gina-una nanda ro ikamayad nga eawas , kaeowasan ag kamaeayran it kada akeanon eabi eon makaron nga tiempo it pandemya .
Uman nga ginapadumdum ro mga pumueuyu nga padayun nga magsunod sa health and safety protocols agud nga malikawan ro pagtaeapnan it sakit.
