KALIBO, Aklan—Ro pagpabakuna kontra sa coronavirus disease 2019 ukon COVID-19 hay makabig nga sambilog sa mga importanteng bagay agud nga matapos eun ro pakikipagsokoe it nasyon sa pandemya nga tuga it COVID-19.
May kaangtanan kara, ginpahayag it sangka epidemiologist nga si Dr. Nellie Rose Sucgang nga mabahoe ro papel it mga health care workers agud nga ma-engganyo ro puliko sa benipisyo it bakuna nga naga-abot sa nasyon kapareho eamang it Sinovac vaccine nga gindonar it China.
Suno pa kana nga dapat hay pasaeamatan it mga pomoeuyo ro libreng bakuna mas kapin pa ag raya hay napamatud-an eun nga epektibo ag nakabulig eun sa ibang nasyon agud amat-amat nga matuldukan ro pandemya.
Apang, ginpahayag dugang it sambilog sa mga ginakabig nga beteranang doctor sa Aklan nga normal eamang ro pagkaangkon it side effect sa mga bakuna kapareho it pagpanakit sa pilang parte it kaeawasan partikular sa ueo.
Raya hay pila eamang sa mga sintomas nga ro sangka pasyenteng ginturukan it bakuna hay naka-eksperyensiya it mild effect bangud sa allergy.
Apang kung makaangkon it grabe nga epekto mas mayad suno pa kana nga gilayon nga magpakonsulta sa doctor ukon magdangop sa emergency facility.
Samtang, ro pagbakuna hay ginahimo it daywang beses ag may agwat nga sang buean.
Pagkatapos it sang buean nga makabatun it ikaywang dose it bakuna hay maidid nga paga-obserbahan ro sangka pasyente.
Sa makarun hay ginataw-an pa eamang it prayoridad sa bakuna hay ro mga health care workers, senior citizens ag ro mga vulnerable sa makamaeatay nga virus.
May kaangtan kara, nagpanawagan si Dr. Sucgang sa publiko nga sundon ro ginapatuman nga health protocol kapareho it simpleng pagsuksok it facemask, face shield ag pag-obserba it sang metro nga distansiya sa kada isaea.
Madumduman nga una eun nga nagpaabot it anang kalipay si Department of Health (DOH) spokesperson Maria Rosario Vergeire matapos ro naging reaksiyon it mga healthcare worker sa inisyal nga pagturok it Sinovac vaccine ko adlaw it Lunes.
Nag-abot eun sa masobra 769 nga mga health workers ro nabakunahan sa nagkaeain nga ospital sa Metro Manila.
Ginpasiguro man it Food and Drug Administration (FDA) nga magapadayun ro andang monitoring ag surveillance sa posibleng side effects it nasambitan nga bakuna.
