KALIBO, Aklan—Pagapabaskugon ro agrikultura agud nga mapataas ro livelihood ag food sufficiency sa probinsiya it Aklan.
Raya ro pila sa mga plano ni dating ex-officio member ag makaron hay elected 1st district sangguniang panlalawigan member Teddy Tupas sa oras nga magapungko eon sa pwesto.
Suno kana nga kat napaki ro turismo ko tiempo it pandemya hay ro agrikultura ro nagbuhi sa Aklan rason nga raya ro anang pagatutukan.
Ro nasambit sigon nga mga programa hay naplastar eon it provincial government rason nga iga-sustain eon lang nanda ag mas pang pagapabaskugon.
Bangud kara, target sigon nana nga buytran ro committee on agriculture ukon appropriations.
Engkaso nga indi maangkon ro chairmanship sa committee on agriculture hay gusto nana nga makaibahan kara bilang member.
Angot kara, ginpasaeamatan man nana ro publiko sa suporta nga ginkita kanda nga limang kandidato sa pagka-provincial board member sa unang distrito kun sa siin puro sanda nagdaog sa idaeum it tibyog akean.
