KALIBO, Aklan—Naging priority topics sa pueong nanday Pangueong Ferdinand “Bongbong” Marcos Jr. ag US President Joe Biden sa White House ro angot sa pagpabaskog sa andang alyansa ag partnership sa tunga it geopolitical issues ag ekonomiya bangud sa COVID-19 pandemic.
Suno kay Bombo International Correspondent Greg Aguilar it California, USA nga ginkalipay it Filipino community ro pagbueuligan it daywang nasambit nga nasyon eabi pa ag may tensyon nga nagakatabu sa palibot it West Philippine Sea ag Asia-Pacific and Indo-Pacific region.
Natalakay man it daywang lider ro 1951 Mutual Defense Treaty nga kinahangean nga pabaskugon sa tunga it nagakatabu nga security situation.
Sa idaeum it kasugtanan, magabueuligan ro Manila ag Washington engkaso nga makaangkon it armed attack sa Pacific Area sa Pilipinas ukon sa US.
Gindugang pa ni Aguilar nga ginpabakod ni Biden ro “ironclad” commitment it US nga depensahan ro Pilipinas.
Kamana man ro padayun nga pagsuporta sa modernisasyon it military sector it nasyon.
Raya hay kadungan man sa ginpatigayon nga Cope Thunder 23-1, sangka military exercise sa Clark Air Base , Pampanga.
Paga-usisaon man it daywa ro mga oportunidad agud nga padaeman ro economic cooperation ag isueong ro inclusive prosperity, paeawigon ro people-to-people ties, pag-invest sa clean energy transition, ag siguraduhon ro pag alaga sa human rights.
Si Marcos hay nag abot sa US ko Domingo, April 30, Washington time , Lunes sa Pilipinas, May 1, para sa official visit.
