KALIBO, Aklan—Owa pa it gintukod nga ano man nga layi sa nasyon nga nagatuyong pagabawaean ukon pagapasugtan ro pagpadaeagan it Presidente bilang bise-Presidente.
Suno kay Atty. Plaridel Morania, sangka batikan nga abogado sa Aklan nga owa it pag-eabag sa layi ro naging desisyon ni Pangueong Duterte nga magpapili sa paeaabuton nga 2022 national election.
Samtang nagaduda man sigon imaw sa naging desisyon ni Duterte bangud bukon pa it klaro ro intensiyon kara sa pagpanaba sa puwesto.
Samtang tama man sigon ro tuyo nga padayunon kara ro owa pa natapos nga programa sa droga, korupsiyon, kriminalidad, kapobrehan ag maabo pang pa.
Saea man sigon nga mapahilway ni Duterte ro anang kaugalinon kung may mga kaso nga ginapasaka eun ukon igapasaka pa eamang kontra kana rason nga magapailihir imaw bilang bise-Presidente.
Suno pa kay Atty. Morania nga owa it “immunity” ro vice president ag puwedi sa gihapon nga maakusahan.
Sa idaeum it national constitution hay ro presidente eamang ro gitan-aw it “immunity”.
Dugang pa kara nga maskin ano man ro intensiyon it Pangueo hay anang ginhingyo ro mga pomoeuyo nga magpili it pulitiko nga angay ag bagay nga magserbi sa nasyon.
Madumduman nga ko adlaw it martes hay ginbatun eun ni Pangueong Duterte ro endorsement it PDP-Laban party nga magpadaeagan bilang Vice President sa 2022 elections.
