KALIBO, Aklan–Ginpasiguro it bag-ong pungko nga Officer-In-Charge ukon OIC Chief of Police it Malay Municipal Police Station nga si Lt. Col. Dainis Amuguis nga pagapadayunon ro hugut nga kampanya kontra sa illegal nga droga ag seguridad it mga turista sa isla it Boracay.
Ginpahayag it opisyal nga magapatigayon sanda it nagkaeain-eain nga mga proyekto ag aktibidad agud nga matapna ukon mabawasan ro iba pang klase it kriminalidad sa banwa.
Pagatutukan man sigon kara ro community engagement ukon partisipasyon it komunidad.
Pagasiguraduhon man nana nga makaangkon it dugang nga tawuhan ro nasambit nga police station nga makaron hay may una nga 292 nga personnel.
Sa pangkabilugan hay gustong iplastar ni Lt. Col. Amuguis ro 5 focused agenda ni PNP chief Police General Benjamin Acorda Jr.
Antes nga nagpungko bilang OIC Chief of Police it Malay PNP station, ro 37-anyos nga opisyal hay na-assign sa police regional office ukon PRO-6.
Ginbayluhan nana si Lt. Col. Don Dicksie de Dios nga nakadestino makaron sa Metro Manila.
Si Amuguis nga tubong Calapan City, Oriental Mindoro hay naeakip sa Philippine National Police Academy Sansinirangan Class of 2007.
Nagtapos man imaw it law, apang owa sigon ginswerte sa 2019 bar exam.
Nakapangasawa it sangka pediatrician kun sa siin nabdos makaron it andang first baby.
