Kalibo Aklan ——Nakadepende sa Inter-Agency Task Force on Emerging Infectious Diseases ro magiging desisyon angot sa pagpaeawig pa it Enhanced Community Quarantine ukon ibalik sa General Community Quarantine ro bilog nga probinsiya it Aklan pagkatapos it Abril 30 nga deadline.
Suno kay Aklan Governor Florencio Miraflores nga makaron hay subject pa ro re-evaluation for Aklan matapos nga maeakip sa kategoryang moderate risk kaibahan ro probinsiya it Capiz.
Ginpahayag it gobernador nga sa idaeum it GCQ hay medyu pagahaeugaan eon ro mga restrictions, apang magapabilin nga sarado ro mga borders .
Igapatuman sa gihapon suno kana ro curfew sa mga minors nga 20 anyos panaba ag mga senior citizens, social distancing ag ro mandatory nga pagsuksok it face mask.
Pagabuksan man sigon kara ro mga malls ag pilang negosyo kapareho it hardware ag mga establisimento nga nagabaligya it essential goods ag serbisyo bangud nga eubus eon nga apektado ro bilog nga ekonomiya .
Samtang, gindugang pa it opisyal nga paga-istoryahan nanda kaibahan ro mga Aklan Mayors kon pagapasugtan eon nga maka-uli ro mga stranded nga mga Aklanon ag Overseas Filipino Workers (OFW’s).
Ro Aklan Training Center suno kana ro andang gintaeana nga quarantine area nga pagabutangan it mga raya.
Igapaidaeum sigon ro mga raya sa 14-day quarantine ag specimen testing agud nga makasigurado nga eowas sanda sa coronavirus disease (COVID 19).
Kumpiyansa man ro gobernador nga maresolba it gobyerno ro COVID-19 crisis kon makipagbueuligan ag magtau it suporta ro tanan pinaagi sa pagsunod sa mga patakaran.
Sa pihak nga parte, mabahoe nga bentaha sigon sa pagdesisyon it IATF ro sambilog eon lang sa 6 nga kaso it Covid 19 sa probinsiya ro nagapabilin nga positibo sa virus ag owa man it may nailistang local transmission.
Nasayuran nga umpisa pa ko Abril 5 hay owa it panibag-ong kaso it makamaeatay nga virus sa probinsiya.
