KALIBO, Aklan — Ginkalipay ni Sangguniang Bayan member Ronald Marte ro pagpaguwa it executive order ni Kalibo Mayor Juris Sucro nga nagahugut sa implementasyon it curfew hour sa mga menor de edad kasunod it serye it mga panakawan.
Suno kana nga sa pihak nga may naga-eksister nga ordinansa angot kara, apang pinaagi sa EO hay mas pa nga mapadali ro pagpatuman it nasambit nga mandu it mga kapulisan ag nagkaeain-eain nga barangay council partikular ro pag-activate sa andang Barangay Intelligence Network.
Tuyo kara nga natumod ag ma-monitor ro hueag it mga ginadudahan nga mga manakaw sa andang nasakupan.
Importante sigon ro curfew agud nga maprotektahan ro mga minors kontra sa paghimo it krimen.
Base sa datos it kapulisan kaeabanan sa mga eakot sa panakawan hay mga pamatan-on eabi eon makaron nga Agosto nga ginakabig nga “tag-gutom”.
Pinaagi sigon sa pagbueuligan it tanan hay matapna ro mga insidente it panakawan.
Umpisa nga mapatuman sigon ro EO ni Mayor Sucro hay naghagan-hagan ro mga insidente it panakawan sa banwa it kalibo.
Ro curfew hour sa banwa it Kalibo hay naga-umpisa alas-10:00 it gabi-i hasta alas-4:00 it aga-aga.
