All-set eon ro pagpahaum it liderato it House of Representatives para sa unang SONA ni Pangueong Bongbong Marcos makaron nga adlaw it Lunes, July 25, 2022 alas 4 sa hapon.
Kahapon ro mga empleyado, congressmen, iba pang mga attendees, PNP personnel ro nagpaidaeom sa RT-PCR tests.
Hugot ro igapatuman angot sa health screening sa tanan nga mga magatambong sa SONA sa Batasang Pambansa Complex kung siin igapaabot it anang diskurso ni Pangueong Marcos sa sangka joint session it Congress.
Suno kay House Sergeant-at-Arms retired BGen. Rodelio Jocson, nagtao eon sanda it mga instructions kung ano ro kinahangean nga paga-ubrahon ag daehon sa mismong adlaw it SONA.
Hinyu ni Jocson sa tanan nga magatambong nga istriktong sundon ro health protocol.
Indi sigon makasueod ro mga bukon it invited ag owa sa listahan.
Umpisa man ko Huwebes ag hasta kahapon, adlaw it Dominggo hay nagpaidaeom sa total lockdown ro Batasang Pambansa Complex.
Kung siin mga essential workers eamang ro ginapasugtan nga makasueod sa sueod it complex.
Dugang pa ni Jocson nga owa sanda it namonitor nga security threat sa SONA day, apang gin-insister it opisyal nga nakapahum ro mga otoridad nga makigsukoe sa ano man nga hangkat.
Samtang, nag-inspection eon man ko nagtaliwan nga Sabado it hapon ro film director nga si Paul Soriano nga magadirect it SONA it pangueo.
Sa pihak nga parte, nagpaguwa eon man it executive order si Quezon City Mayor Joy Belmonte nga igasuspinde ro klase sa tanan nga lebel sa siyudad private man ukon public schools.
