KALIBO, Aklan–Kasado eon ro pagpahaum it Municipal Health Office it banwa it Kalibo para sa mass vaccination program.
Raya hay kasunod it ginaeauman nga pag-abot it 16,400 doses it AstraZeneca vaccines nga gin-order it LGU-Kalibo para sa mga healthcare workers kara.
Nagbilog suno kana it kapin sa 13 nga komitiba ro pamunuan it MHU para sa maayos, komprehensibo ag konkretong vaccination plan agud nga masiguro ro kaeowasan it mga magapabakuna.
Suno kay Municipal Treasurer ag Vaccine Czar Rey Vllaruel nga ginatinguhaan sigon kara nga masunod ro standard it Department of Health nga makaangkon it 100 nga mabakunahan sa sueod it sang adlaw.
Posible suno kana nga umabot it pitong adlaw ro andang inoculation.
Gintaeana sigon ro birthing facility it Kalibo sa may N. Roldan St. nga cold chain storage facility bangud nga maeapit raya sa gin-designar nga vaccination center sa covered court it Kalibo Pastrana Park ag gym it Aklan Catholic College.
Ginpahayag dugang nga nag-obserba man sanda sa ginpatigayon nga inoculation it provincial government gamit ro Sinovac vaccine.
Samtang, gindugang pa ni Villaruel nga naga-double time sanda makaron sa pagpatigayon it validation ag profiling nga pagabasehan sa paga-obrahon nga master list ukon listahann it mga gusto ag may potensiyal nga magbaton it bakuna.
Kaibahan sa prayoridad ro mga senior citizens, pigado nga pamilya , government workers ag iba pa.
Tuyo kara nga makabo-oe it ensaktong numero it pagabak-eon nga bakuna.
Plano sigon it covid 19 committee ag local finance committee nga haum sanda nga magbakae it maskin anuman nga available nga bakuna.
Kadungan kara ro anang pag apela nga suportahan ro andang mass vaccination program agud nga suk-ean ro makamaeatay nga virus ag makaangkon it heard immunity.
