KALIBO, Aklan—Agud nga epektibong ma-kontrol ro pagkalhit it Coronavirus hay ginmandu ni Punong barangay William Lachica Jr. it Andagao, Kalibo ro pagpaidaeum sa home quarantine it mga high risk contact it andang mga nagpositibo nga residente sa sakit.
Suno kana nga nataeupangdan ro nagtaas it infection rate ag numero it kaso sa mga magpamilya nga naga-istar sa sangka baeay.
Nasayuran nga ro andagao hay ro sambilog sa may pinakamaabu makaron nga kaso kun sa siin ko nagtaliwan nga adlaw hay nadugangan it 18 ro andang aktibong kaso.
Bangud nga punuan eon ro facility quarantine it LGU-Kalibo, nagdesisyon sigon ro andang barangay council nga ro high risk contact nga owa it sintomas ro pasugtan nga mag home quarantine.
Kaeabanan sigon sa mga natapnan makaron it covid ag gindaea nanda sa mga quarantine facility hay mga senior citizens nga owa pa naturukan it bakuna.
Kadungan kara, uman nga nag apela si kapitan Lachica sa anang mga pumueuyu nga bukon pa it tapos ro krisis rason nga padayunon ro pagsunod sa minimum health standards kapareho it pagsuksok it face masks, social distancing, ag pirmeng pag disinfect it alima gamit ro tubi ag sabon ukon alcohol agud nga matapna ro transmission it virus.
Ginhinyu man nana ro mga raya nga indi anay mag-inagto sa kaeapitbaeay agud nga malikawan ro pagtaepnan.
