Kalibo Aklan —–Ginatugyan ni Governor Florencio Miraflores sa mga lokal nga gobyerno ro pagdesisyon kon pagapasugtan ro mga pumnueuyu sa pagpaligos sa mga baybayon para sa selebrasyon it kapiestahan ni San Juan De Bautista sa Hunyo 24.
Suno sa Gobernador nga importante nga makasunod sa guidelines it National Inter-Agency Task Force on Emerging Infectious Diseases partikular ro pagpatuman it social distancing ag pagsuksok it face mask bangud sa paeag it coronavirus disease (COVID-19) pandemic.
Nagapabilin nga bawae suno kana ro pagguwa sa baeay it mga naga-edad it 60 pataas ag 21 anyos panaba kamana man ro mga nabdos.
Ginpahayag dugang nga maskin ginapasugtan eon ro pagbaligya it aeak, bawae gihapon ro pag-inom it makahieilong nga ilimnon sa mga pampublikong lugar.
Ginpadumdum pa it Gobernador nga owa pa nabag-o ro anang ginpaguwa nga Executive Order umpisa nga ginpaidaeum ro probinsiya it Aklan sa Modified General Community Quarantine (MGCQ).
Nasayuran nga nauna eon nga nagpa-abiso ro LGU Numancia ag Kalibo nga bawae anay ro mga selebrasyon may kaangtanan sa kapiestahan ni San Juan de Bautista .
Sa banwa it Kalibo hay kanselado anay ro andang dag-unan nga aktibidad kapareho it food festival, parlor games para sa mga inunga ag nakasanayan nga pagtipon-tipon sa mga baybayon ag kasubaan.
