KALIBO, Aklan — Nagapabilin nga bawae ro pagpaligos sa baybayong sakop it isla it Boracay maskin una eon lang sa storm signal No. 1 bangud sa bagyong Tisoy ro probinsya it Aklan.
Sa advisory nga ginpaguwa it lokal nga gobyerno it Malay nga imaw ro may hurisdiksyon sa Boracay, halin kahapon Disyembre 2 hay bantay-sarado it mga tawuhan it Municipal Disaster Risk Reduction and Management Office (MDRRMO)-Malay ro baybayon it isla agud padumdumon ro mga residente ag turista nga hugot anay nga ginabawaean ro pagpaligos bangud sa mabaskog nga hangin ag humbak.
Importante sigon nga magsunod sa mga paandam ukon regulasyon kapin eon ro mga turista agud makalikaw sa aksidente.
Una kara, nagpaguwa man it advisory ro Philippine Coast Guard (PCG-Aklan) nga off-limits anay para sa mga mahilig sa mga recreational activity sa dagat kaparehas it parasailing, paraw operations ag iba pang non-motorized water sports kaparehas it kayak ag paddle boarding.
Ginpasiguro it Coast Guard nga bastante ro gintaeana nandang tawuhan sa nagkaeain-eain nga parte it isla.
