Kalibo Aklan ———Ginabawae anay sa mga residente ro pagpaligos sa kasubaan ag dagat ukon anuman nga klase it recreational activity sa mga baybayon nga sakop it Isla it Boracay sa selebrasyon it kapistahan ni San Juan de Bautista sa Hunyo 24.
Raya hay matapos nga magpaguwa ro lokal nga gobyerno it Malay it advisory agud nga malikawan ro mga pagtambay, pagkaon ag pag-inuman nga nagiging rason it pagtipon-tipon ag naeabag eon ro physical distancing.
Suno kay Malay Mayor Frolibar Bautista nga nagapabilin nga bawae ro pagguwa it mga tawo kon bukon man lang it importante ro paeanawon bangud sa extended it daywang domingo ro ginapatuman nga Modified General Community Quarantine (MGCQ) with heightened restrictions base sa Executive Order ni Aklan Governor Florencio Miraflores .
Base sigon sa pagtuon nga ro mga local gatherings ro ginaturo nga rason it pagkalhit it COVID-19 sa banwa it Malay.
Naging tradisyon eon it mga Filipino nga magpaligos sa baybay ag kasubaan kada selebrasyon it San Juan.
Samtang, ginklaru ni Mayor Bautista nga exempted sa nasambit nga mandu ro mga turista sa Isla it Boracay.
Raya hay bangud nga mag-eowas nga tourist destination ro Isla hay puro negatibo man sa COVID-19 ro mga nagasueod nga bakasyunista .
Nasayuran nga sambilog sa mga requirements agud nga makasueod sa Boracay hay ro negative RT PCR test result.
