Bangud sa pagkabaeaka sa posibeng magiging epekto, gindesisyunan it sangguniang panlalawigan nga magpatigayon it special session agud nga ipahayag ro andang pagpamaeabag sa planong pagbukas it international flights sa Godofredo P. Ramos Airport sa Caticlan, Malay.
Raya hay kasunod sa plano it San Miguel Corporation nga magbukas it international flights halin sa Taiwan.
Nasayuran nga ro nasambit nga kompaniya ro nagadumaea sa nasambit nga paeuparan.
Suno kay aklan vice governor Reynaldo Quimpo nga engkaso nga madayun, raya hay may mabahoe nga epekto sa ekonomiya ag turismo it probinsiya.
Mag-eowas kara, mawad-an suno kana it pueos ro pag-develop ag pagpaeapad it national government sa koordinasyon it provincial government sa mga pasilidad it kalibo international airport agud nga makasunod sa international standard.
Madumduman nga nakibot eamang ro provincial government matapos abisuhan it Bureau of Immigration nga magpahaum para sa inaugural flight sa Caticlan it Royal Air halin sa Taipei.
Bangud kara, ginmandu ni Aklan Governor Florencio Miraflores sa SP nga magpaguwa it resolusyon angot sa pagpamaeabag sa plano it nasambit nga kompaniya bangud sa kawad-an it konsultasyon.
Makabig suno kana nga bukon pa it ideal ro paeuparan nga magbukas it international flights bangud sa kakueangan it pasilidad , kun sa siin nakadesinyo eamang raya sa domestic flights.
Nagakabaeaka man sanda nga maduea-an it kita ro Kalibo International airport.
