Ginkumpirma it Western Mindanao Command (Westmincom) ro natabo nga pagpamaril sa Barangay Langil, Hadji Mohammad Adjul, Basilan ko dominggo, Mayo 11, sang adlaw bago ro midterm elections, kon sa siin ap-at ro namatay sa insidente.
Ginkilaea ro mga napatay nga sanday Addahang “Marlboro” Abdulla, 45, ag Hajarani Maha, 63, parehong barangay tanod; ag ro daywang suspek nga sanday Jul-Asbi “Imbo” Misuari, 44, ag Jun Awang, 39.
Suno kay Col. J-jay Javines, tagapaghambae it Westmincom, nagpatigayon it inspeksyon sanday Abdulla ag Maha sa sangka primary school nga magaserbeng presinto sa eleksyon kat sanda hay ginpangbaril halin sa sangka baeay maeapit sa eskwelahan.
Nag-abot si Barangay Chairwoman Amna Pawaki ag ro anang mga tawuhan, nga nauli sa engkwentro kon sa siin napatay man ro daywang suspek.
Eagi man nga nagpadaea it dugang nga pwersa ro 101st Infantry Brigade agud siguraduhon ro seguridad sa Barangay Langil ag sa munisipyo it Hadji Mohammad Adjul.
Gin-umpisahan eon man ro clearing ag hot pursuit operation kontra sa mga nagpaeagyong armadong suspek.
Samtang, ginbuksan gihapon ro mga presinto ag ginpadayon ro eleksyon sa pihak it insidente.
Gin-engganyo mat-a it militar ro publiko nga bumoto it matawhay ag ireport ro anumang impormasyon nga makabulig sa pagkaaresto sa mga suspek sa mga hotline it Westmincom nga 0917-504-4298 at 0977-076-6870.
