KALIBO, Aklan—Makabig nga pagbayolar sa kinamatarong it mga pumueuyo sa idaeom it Human Rights ro gina-ubra it Land Transportation Franchising and Regulatory Board (LTFRB) ag Department of Trnasportation (DOTr) sa pagpwersa ukon pagpilit sa mga transport sector nga magsuoed sa consolidation.
Raya ro pahayag ni Moody Toque Floranda, chairman it Pagkakaisa ng mga Samahan ng Tsuper at Opereytor Nationwide (PISTON) sa nagahilapit nga deadline it consolidation sa mga public and utility vehicle sa Disyembre 31.
Suno kana, ginapwersa sigon it mga nasambit nga ahensya kaibahan it makaron nga administrasyon nga magsueod sa modernization apang indi raya masarangan it pila sa mga drayber ag operator.
Dapat sigon nga owa ginapilit ukon ginapwersa ro mga drayber nga magsunod sa programa it gobyerno eabi eon kon indi nanda raya masarangan.
Nasayuran nga maabo nga mga jeepney ag utility vehicles sa National Capital Region ro owa pa nakasueod sa consolidation.
Base sa datos it LTFRB, haeos 25% eamang sa mga tradisyon nga jeep ro nagsueod kara, ag 36% man ro mga UV’s nga nagsueod.
Suno pa kay Floranda, mabahoe nga prosyento it mga public transport sa Metro Manila ro nagapabilin nga indibidwal ro prangkisa ag operator rason nga sangkiri eamang nga porsyento ro nagsueod sa consolidation.
Base man sa nasambit nga ahesnya, haeos 9,930 ka mga modern jeepney ro nagadaeagan sa bilog nga nasyon kon sa siin 1,500 ka mga units hay una sa NCR sa 35 ka mga ruta.
Pahayag dugang ni Floranda nga maabo gihapon nga mga ruta sa Metro Manila hay ro mga traditional jeep ag mga UV’s.
Madumduman nga nag-file it petisyon ro PISTON sa Korte Suprema para pamaeabagan ro Public Utility Vehicle (PUV) Modernization Program it gobyerno.
