Nakaangkon it maeapnagon nga power ag water interruption sa Guam kasunod it pagpanaeasa it Typhoon Mawar.
Suno kay Bombo International Correspondent Isidra Naig-Coloma, tubong banwa it Altavas apang kapin sa 15 anyos eon nga naga-istar sa US teritory nga Guam nga imaw pa eamang nanda naeksperyensyahan ro makandato kabaskog nga bagyo.
Umawas ro mga swimming pool nga nagresulta it pagbaha ag nasoe-ob ro andang mga panimaeay.
wa it bukas nga mga establisyimento bangud sa mga nagkalhit nga debris maghalin sa mga saeaming nga nagkaeabasag tuga it pagbayo it mabaskog nga hangin.
Nagbaealiskad ro mga saeakyan ag nagtumbahan ro mga punong kahoy.
Ro andang ginagamit makaron nga tubi sa andang comfort room hay maghalin sa andang swimming pool samtang ro malimpyong tubi nga ginainom ag panghugas it andang kinan-an nga mga pinggan hay nagabyahe pa sanda paadto sa mga water station nga may generator set.
Naga-charge sanda it mga cellphone sa andang saeakyan.
Eowas ro pamilya ni Coloma ag ginpasiguro man kara nga makasurvive sanda it pilang adlaw bangud sa napreparar nga mga delatang pagkaon antes pa man tumama ro bagyo.
Ginaeauman nga sa masunod nga inadlaw hay maabot eon sanda it ayuda maghalin sa gobyerno sa oras nga mahawanan ro mga daeanon.
Ulihi nga tumam ro mabaskog nga bagyo sa Guam hay kato pang 2002.
