KALIBO, Aklan — Nagapati si Atty. Jude Mangilog, presidente it Integrated Bar of the Philippines (IBP) Aklan Chapter nga posibleng makaangkon it negatibong epekto kay Senador Ronald Bato dela Rosa ro anang pagpinanago makaron maskin nga owa pa opisyal nga nakapaguwa it arrest warrant ro International Criminal Court kontra kana.
Engkaso suno kana nga maaresto ag magpangayo man imaw it interim release ukon temporaryo nga kahilwayan hay mabahoe ro posibilidad nga indi kana raya igatau.
Raya hay bangud nga ro anang pagpanago hay nagapakita suno kana it kawad-an it kahauman nga magkooperar sa proceedings it ICC .
Nasayuran nga nagapabilin nga owa nakikita it publiko ag owa nagatambong sa mga sesyon it Senado si Senador Dela Rosa sa sueod it haeos sang buean eon.
Raya hay sa tunga it mga report nga nagpaguwa sigon ro ICC it warrant para sa anang pag-aresto.
Uman nga naistoryahan ro isyu matapos mag-post sa social media si dating presidential spokesman Harry Roque nga nagapanawagan sa senador na i-insister ro kinamatarung nga ipa-atubang anay imaw sa sangka korte sa Pilipinas.
Nagpahayag man it kahauman ro senador nga atubangon ro kaso gamit ro tamang legal nga pamaagi.
Raya hay angot sa nagapadayun nga imbestigasyon it ICC sa mga gina alegar nga pagpang-abuso sa kampanya kontra droga ko nagtaliwan nga administrasyon.
Sa makaron hay owa pa it ginpaguwa nga pahayag ro ICC agud nga kumpirmahon ukon pamalibaran ro pag angkon it warrant para kay Dela Rosa.
