KALIBO, Aklan—Umpisa nobyembre 15, 2020, bawae anay ro pagpangisda sa baybayon nga sakop it Visayan Sea sa sueod it tatlong buean.
Raya ro ginkumpirma ni Bureau of Fisheries and Aquatic Resources ukon BFAR-Aklan OIC Rico Magno.
Sandig sigon raya sa Fisheries Administrative Order 167-3 series of 2013 nga nagamandu it closed season eabi eon ro pagdakop, pagbaligya ag pag-market it mga sardinas, herring ukon tawilis ag mackerel.
Gindugang pa kara nga tuyo it nasambit nga closed season nga makaangkon it kahigayunan ro mga isda nga tawilis, sardinas, ag mackerels nga makapa-abu it itlog ag magbahoe ro mga raya agud nga maging bugana eon man ro pagpangisda sa Visayan Sea nga makabenepisyo it mabahoe sa mga mangingisda ag mga pumueuyu.
Sa Western Visayas, sakop it closure ro mga baybayon it Barotac Nuevo, Anilao, Banate, Barotac Viejo, Ajuy, Concepcion, San Dionisio, Batad, Estancia, Balasan, ag Carles; kamana man ro parte it Capiz eakip ro Roxas City, Pilar, Pontevedra, President Roxas, ag Panay.
Kaibahan man ro EB Magalona, Victorias City, Manapla, Sagay City, Cadiz City, ag Escalante City sa naaminhan nga parte it Negros.
Ro closed season ukon pagpahuway sa baybay hay magatapos sa pebrero it masunod nga dag-on.
