Kalibo Aklan —–Maskin nga nagatuga it pagkabaeaka ro coronavirus disease (COVID-19 , apang gintur-an kara makaron ro tanan nga maging malimpyo sa kaugalingon, sa palibot ag makaangkon it disiplina nga mabuhay eon nga ginabalewala it kaabuan .
Suno kay Sangguniang Panlalawigan Member Atty Harry Sucgang nga nakapahuway it husto ro kalibutan matapos nga humina ro aktibidad it mga tawo nga nagbawas man sa polusyon eabi eon sa air ag noise pollution.
Mabahoe suno kana ro nabawas sa ginakonsumo nga elektrisidad ag tubi bangud sa paglikaw it mga tawo nga mag-agto sa mga matawo nga mga lugar rason nga haeos tanan nga mga malls hay temporaryo anay nga nagsarado kamana man ro haeos tanan nga mga pabrika ag iba pang establisimento komersiyal .
Bangud suno kana sa ginpatuman nga enhanced community quarantine ag curfew hay temprano pa eamang hay nagakatueog eon ro mga tawo ag nagapabilin eamang sa sueod it baeay .
Nakaangkon man sigon it manami nga family bonding makaron ro mga tawo matapos nga maabung oras ro andang pag-ililiba sa sueod it panimaeay .
Kaabuan suno kana sa pamilya hay naga-bonding pinaagi sa pagbueuligan sa paglimpyo it baeay ag palibot .
Matsa gin-tiempo man sigon ro hitabu sa kwaresma agud nga mataw-an it oras ro tanan nga makapamaeandong it mabuhay .
Maskin sigon ro mga gamhanan ag kwartahan makaron hay nagapangamuyo bangud sa krisis.
Gina-practice sigon makaron it mga tawo ro survival bangud haeos ro tanan hay nagapangabuhi it simpli , kung sa siin , owa it ibang gina-isip nga kabuganaan kundi kon paalin nga mabuhi.