KALIBO, Aklan–Naging maayos ro pagpanupod it bugas ag food packs it Bayan Muna sa mga miyembro it PAMALAKAYA ko Oktobre 12 hasta 13 sa Brgy. Cawayan, New Washington.
Suno kay Former Bayan Muna Partylist Representative Teddy Casiño nga owa it anumang kondisyon sanda nga ginplastar para sa mga benepisyaryo.
Sa kamatuoran suno kana hay mga mismong miyembro it organisasyon ro nagbaton ag nagrequest nga mataw-an sanda it ayuda.
Naga-abot sigon sa 150 food packs ro andang ginpahaum kaeakip ro an-om nga kilo it bugas bilang bulig sa mga pumueoyo nga eubus nga nabudlayan sa andang pagpangabuhi.
Insigida sigon nanda nga gintaw-an it katumanan ro hinyu it organisasyon para makita ro sitwasyon sa lugar eabi pa ag may nakadeploy idtu nga kapin sa 30 ka mga soldado.
Ginapahayag nga nagapamaeay-maeay ro mga militar ag ginalaygayan ro mga miyembro it PAMALAKAYA nga maghalin eon sa grupo.
Sa pihak nga parte, ginkondena man kara ro gina-alegar nga pagpamaeag it mga soldado sa mga miyembro it PAMALAKAYA.
Raya hay matapos nga makabaton sanda it impormasyon nga ginahambaean it mga soldado ro mga nasambit nga indibidwal nga maghalin sa organisasyon.
Sa oras sigon nga nagapabilin gihapon ro mga raya bilang miyembro hay pagabalikan sanda ag igalista bilang komunista ukon terorista kung siin kinahang-ean nanda nga limpyuhan ro andang pangaean sa natungdan nga barangay.
Ro ginahimo sigon it militar hay bukon it tama bangud nagatuga raya it kahadlok sa mga miyembro it organisasyon.
