KALIBO, Aklan—Gin-umpisahan eon it barangay council it Poblacion, Kalibo ro pagpanupod it food packs para sa mga residente nga apektado it ginpatuman nga Granular Enhanced Community Quarantine (GECQ) sa Purok 12 it Oyo Torong Street.
Suno kay Punong barangay Niel Candelario it Poblacion, Kalibo nga pagatinguhaan nanda nga mataw-an it ayuda ro kada pamilya nga apektado it lockdown.
Nagpaabot eon man sigon it food assistance ro lokal nga gobyerno it Kailibo kamana man nga si Aklan Governor Florencio Miraflores hay magapadaea man it dugang nga bulig.
Nag-apela man si kapitan sa mga pumueoyo nga makipag-kooperar sa mga otoridad ag padayun nga magsunod sa minimum health protocols kamana man nga likawan anay ro pagguwa it baeay.
Nasayuran nga may una eon nga 20 nga aktibong kaso it COVID-19 ro nasambit nga purok rason nga ginpaidaeom raya sa waeong adlaw nga lockdown nga nag-umpisa ko Hulyo 21 ag magatapos sa Hulyo 29, 2021.
Angot kara, ginpasaeamatan man it opisyal ro pakikibuylog it Kalibo PNP ag iba pang opisyal it barangay agud nga bantayan ro lugar.//Ro ginapasugtan eamang nga makasueod ag makaguwa sa critical zone hay ro mga essential workers.
Mag-eowas kara, temporaryo man nga ginsarado ro mga non-essential establishment nga sakop it lockdown.
Samtang, ginpahabaan man ro curfew sa nasambit nga Purok umpisa alas-7 it gabi-i hasta it alas-5 it aga-aga kamana man nga nagapadayun ro pagpa-iral it liquor ban.
