KALIBO, Aklan — Pangkabilugan nga naging madinaeag-on ro pagpanupod it P10,000 nga financial aid sa kapin sa 2,500 nga mga mangunguma ag mangingisda nga eubus nga naapektuhan it El Niño sa probinsiya it Aklan, adlaw it Martes, Hulyo 30 sa ABL Sports and Cultural Complex sa Capitol Site, Kalibo.
Suno kay Engr. Alexys Apolonio, head it Office of the Provincial Agriculture nga ro ayuda hay naghalin sa idaeum it Presidential Assistance to Farmers, Fisherfolks, and their Families.
Ro mga nataw-an it ayuda nga mga farmers ag fisherfolks ko nagtaliwan nga adlaw hay naghalin sa banwa it Kalibo, New Washington, Banga ag Madalag kamana man ro tanan nga mga banwa sa ikaywang distrito mag-eowas sa Makato ag Malay.
Sa adlaw it Huwebes hay naka-schedule man ro distribution sa mga banwa it Altavas ag Batan.
Ro Aklan hay nakalista it kapin sa 5,000 nga mga beneficiary.
Sa pihak nga parte, ginpahayag ni Engr. Apolonio nga gindesisyunan it provincial government nga ipaiway anay sa anang original schedule ro distribusyon it ayuda sa masobra sa 800 nga mga benepisyaryo sa banwa it Makato.
Tuyo kara malikawan ro posibleng kinagamo bangud sa nagtuhaw nga owa pagka-ilintindihan dugang pa nga idtu mismo ro venue it distribution.
Dugang pa ni Engr. Apolonio nga status quo anay ro listahan nga nagakahueugan nga owa it anuman nga pagabag-uhon sa original nga mga benepisyaryo.
Ginklaru man nana nga ro master list it mga makabaton it ayuda hay owa naghalin kanda kundi sa local government unit it Makato bangud nga sanda ro nag-validate.
