KALIBO, Aklan — Ginmandu ni Kalibo Mayor Juris Sucro ro pagpaiway sa pagpasarado sa mga delinquent nga stall owners sa Kalibo Shopping Center ag Kalibo Public Market.
Madumduman nga nauna eon nga nagpaguwa it ultimatum ro pamunuan it Municipal Economic Enterprise Development Office (MEEDO Kalibo) kontra sa pito nga mga stall owners it Kalibo Shopping Center nga owa nakabayad it andang renta .
Suno kay Mary Gay Quimpo-Joel , head it MEEDO-Kalibo nga sa nasambit nga numero hay may sambilog nga naghingagaw nga makabayad ko nagtaliwan nga adlaw it Lunes .
Nakabaehag sigon sa MEEDO board resolution nga eubusan eon nga ipasarado ro mga delingkwente nga stall occupants and owners nga owa pa naka-settle it andang obligasyon sa munisiyo nga naga-abot sa kabilugan nga P1.5 milyon sa Kalibo Shopping Center samtang kapin mat’a sa P7.5 milyon sa Kalibo Public Market.
Apang sa ginpatawag nga meeting ko nagtaliwan nga adlaw kaibahan ro oversight committee nga in-charge sa closure, ginmandu sigon ni Mayor Sucro nga ipaiway anay ro implementasyon it closure order it nasambit nga mga establishment hasta nga owa pa imaw maka-abot halin sa anang biyahe sa abroad.
Ro closure order hay base sa ginpaguwa nga executive order it alkalde.
Samtang , bangud sa pending relocation, gusto it MEEDO nga maayos ro record it mga stall owners sa Kalibo Public Market partikular ro may mabahoe nga kautangan.
Mag-eowas sa stall rentals hay owa man sigon it permit ro mga raya.
Maeawig eon suno kana ro palugit nga gintau sa mga negosyante nga ro iba hay owa eon nakabayad antes pa ro Covid 19 pandemic.
Sa pihak nga parte, gina-imbestigahan eon man nanda ro mga napabalita nga may pilang stall owners nga ginapa-rentahan ro andang stalls bangud nga makabig raya nga eabag sa laye.
