KALIBO,Aklan– Dapat nga pag-isipan it mayad ni Pangueong Ferdinand Marcos Jr., ro pagbaton sa mga refugees halin sa Afghanistan.
Raya ro ginpapahayag ni Atty. Harry Sucgang, sangka batikang abogado sa Aklan.
Suno kana nga kinahangean nga mausisa it husto it manaba ag mataas nga kapueungan it kongreso kon ano ro mayad nga igatuga sa nasyon it gina-offer it amerika kabaylo it andang hinyu nga temporaryong batunon it Pilipinas ro mga nasambit nga Afghan refugees.
Indi suno kana malikawan nga magkabaeaka bangud nga nakataya kara ro seguridad it Pilipinas nga owa man it masyadong ikasarang agud nga suk-ean ro mga terorista.
Nasayuran nga ro Afghanistan hay dating pugad it kilaeang teroristang si Osama Bin Ladin kun sa siin hasta sa makaron hay nagapabilin ro anang mga galamay idtu.
Posible sigon nga mahaluan it mga terorista ro mga refugees.
Sa pihak kara, ginpahayag ni Atty. Sucgang nga owa it problema kon sa tamang proseso ro pagpasueod sa mga afghans ag kon raya hay temporaryo eamang.
Madumduman nga ginhinyu it US nga taw-an it daywang domingo ro ginaboebanta nga 50,000 nga mga Afghans nga nag eskapo sa andang nasyon bangud sigon sa pag-eagas kanda it mga Talibans.
Raya hay agud nga mataw-an man it bastanteng tiempo ro mga afghans sa pagproseso it andang US visas.
Ro request it US hay owa pa it pinal nga desisyon it Pilipinas.
Sa pihak nga parte, ginpahayag ni Atty. Sucgang nga ideal sigon ro Spratly Island ukon Kalayaan Island nga temporaryong ilistaran it mga Afghan refugees agud nga malikawan ro pagpinanaw it mga raya.
