KALIBO, Aklan—Gintaw-an it punto it sangka Nurse Advocate ag Front Runner on Breastfeeding Program ro importansya it pagpasuso it mga ina sa andang eapsag.
Suno kay Ms. Adhara Alcudia Sebuado nga importanteng masayuran it sangka ina ro mga benepisyo nga mabuoe halin sa andang gatas.
Ro pag-angkon it unga hay sambilog sa pinakamanami nga eksperyensya it mga kababayin-an.
Halin sa pagnabdos hasta sa mai-unga ro eapsag, natural eamang nga siguraduhon it ina ro kalidad it pag-alaga nga anang igatao.
Ro breast feeding ukon pagpasuso hay sangka pamaagi it pagtao it gatas sa sangka eapsag halin sa dughan it sangka ina.
Sa baylo nga painumon it formulated milk ro unga, ro natural nga gatas ukon breast milk ro dapat nga itao.
Suno sa mga eksperto sa World Health Organization, mas manami kung exclusively breastfeed ro sangka baby sa first six months it anang kabuhi para makaangkon it maayos nga pagbahoe, brain development ag mabaskog nga pang-eawason.
Ro exclusive breast feeding hay ro pagtao it breast milk eamang nga owa it halo nga anumang pagkaon ukon ilimnon ag maskin tubi.
Nakakabulig man ro breast feeding para mag-process it maayos ro reproductive system it sangka babaye, mabalanse ro hormones sa eawas ag maging magnaba ro risk sa pag-angkon it mahinang reproductive health nga pwedeng magresulta sa ovarian ukon breast cancer.
Ro breast feeding hay makabig man nga sangka natural contraceptive bangud indi madali nga manabdos ro sangka babaye kung exclusive ro pagpa-breast feed kara.
Samtang, gin-engganyo man kara ro mga ina nga makibuylog sa breastfeeding activity it gobyerno para makapaathag it awareness angot sa importansya ag benepisyo it pagpasuso.
