KALIBO, Aklan—Umpisa sa Pebrero 1, pormal eon nga igapatuman ro Municipal Ordinance no. 431 series of 2020 nga nagataeana it pagpataas it panueuktan sa environmental fees sa mga turista nga nagasueod sa isla it Boracay.
Ro nasambit nga ordinansa hay gin aprubahan it sangguniang panlalawigan ko nagtaliwan nga Nobyembre 9, 2020.
Halin sa dating P75, ro environmental fee hay pagapataasan eon sa P150 sa mga local tourist nga bukon it Aklanon.
Ro mga senior citizens, PWDs ag mga estudyante hay P120.
Samtang, ro environmental fee para sa mga foreign tourists hay P300.
Nauna eon nga ginpahayag ni Malay SB member Maylynn Aguirre Graf nga kinahangean nga makaangkon it bag-ong panueuktan para sa “preservation it isla it Boracay.”
Makabig sigon raya nga revenue-generating project para sa lokal nga gobyerno it Malay agud nga masabat ro mga gastos sa tourism infrastructure ag environmental ag tourism concerns.
Sa pihak nga parte, ginpabutyag it pilang turista nga raya hay dugang eamang nga gastos mag-eowas sa gina-require nga mahae nga RT-PCR tests.
