Suno sa Philippine Statistics Authority (PSA), ro sangka household hay nagakinahangean it indi magnaba sa sa P12,030 pesos kada adlaw agud nga makaeowas sa poverty threshold.
Sa makaron, ro kada adlaw nga minimum nga sweldo nga P570 pesos sa Metro Manila hay katumbas eamang it P11,400 kada buean para sa sangka obrero nga nagatrabaho it limang adlaw sa sang domingo.
Angot kara, agdihon eon it petisyon ro mga labor groups para sa P100 pesos nga kada adlaw nga dugang nga sweldo para sa mga trabahador sa Metro Manila sa Regional Tripartite Wages and Productivity Board.
Gindihon sigon ro petisyon sa ngaean it mga minimum wage earners sa agricultural ag non-agricultural sector kamana man sa retail, trade ag manufacturing groups.
Ro petisyon nga pataasan ro minimum nga sweldo hay naghalin sa pagkinahangean it mga empleyado nga mabawi ro naduea nga kantidad it andang mga suweldo, masarangan ro pagtaas it kantidad it pagpangabuhi ag makaangkon it maayos nga kabuhi bilang ordinaryong trabahador.
Ginhinyu sa Regional Tripartite Wages and Productivity Board nga makaangkon it bag-ong wage order bangud nga nagtaas ro inflation rate.
Sa pihak nga parte, nauna eon nga nagpahayag it pagpamaeabag ro grupo it mga negosyante sa hirit nga umento.
Suno kanda nga owa pa eubusan nga nakabawi ro negosyo ag mabudlayan sanda eabi eon ro mga maisot nga business kun pagapataasan ro pasweldo nga posibleng magsarado eon lang.
Kumbaga, sarado-negosyo, owa it trabaho, pare-parehong nganga.
Rason nga dapat nga tun-an it mayad ro isyu sa sweldo.
Naintindihan naton nga raya hay makabulig sa mga trabahador apang pamatian man ro mga employer.
Samtang, kun ro atong gobyerno hay may nakatago pa nga pondo, basi puwedeng paeawigon pa ro subsidiya.
Dunganan man ro pagbukas it mga programa ag proyekto nga puwedeng makitaan.
Okey man ro pagpanupod it ayuda, apang mas mayad kunta kon trabaho ro mismong buksan.
Testingan man naton nga mag-invest sa kaaeam, kamayad ag kahugod it publiko.
