DAMASCUS, Syria — Uman nga nabuhi ro kasadya sa nasyon it Syria kasunod sa pagpatalsik it andang presidente nga si Bashar al-Assad.
Raya hay matapos nga makontrol it Islamist militant group nga Hayat Tahrir al-Sham ro kabisera nga Damascus ag iba pang lugar sa nasambit nga nasyon.
Suno kay Bombo International News Correspondent Lea Rosales, nagakinasadya makaron ro mga tawo bangud sa kahilwayan nga andang naangkon halin sa pagdumaea it nasambit nga presidente.
Una kara, daywang dominggo eon ro nakataliwan kat malig-on ro posisyon ni Bashar al-Assad sa pihak it 13 anyos nga gyerang-sibil nga nag-umpisa matapos ro marahas nana nga pagsabat sa pro-democracy protests daea it Arab Spring.
Sa bulig it Russia, Iran, ag mga militanteng ginpabaskog it Iran, napilitang umatras ro mga rebelde sa sangka maisot nga parte it naaminhan-nakatungdan it Syria.
Ginpamalibaran ni Assad ro mga panawagan para sa negosasyong pampolitika agud tapuson ro gyerang pumatay it masobra tunga sa milyong katawo.
Apang, nasamad ro imahe it kalig-unan it gobyerno ni Assad kat magpatigayon it madasigan nga opensiba ro Islamist militant group nga Hayat Tahrir al-Sham.
Bangud sa masako ro mga dumueoong kaalyado ni Assad sa iba pang gyera ag inde makatao it bulig, bumagsak ro military it Syria sa sueod eamang it 12 diyas.
Sa makaron suno kay Rosales hay balik eon sa normal ro pagpangabuhi it mga tawo sa Syria maging ro trabaho sa gobyerno ag ro klase sa mga eskwelahan.
