KALIBO, Aklan — Ginpaabot it Commission on Human Rights (CHR) nga naglunsar sanda it independent investigation sa pagpatay sa beteranong mamamahayag nga si Juan “Johnny” Dayang.
Patay sa pagbaril si Dayang, dating naging interim mayor it Kalibo ag chairman emeritus it Publishers Association of the Philippines Inc. (PAPI), sa sueod it anang baeay ko gabi-i it Martes.
Imaw hay namatay sa edad nga 89.
Hugut nga ginakundina it CHR ro brutal nga pagpatay kay Dayang.
Nagdeploy sigon sanda it Quick Response Operation Team agud nga magpatigayon it independent investigation.
Si Dayang hay dating presidente it PAPI ag dating publisher it Philippine Graphic, ag kolumnista it Manila Bulletin.
Gin engganyo man it CHR ro media practitioners nga insigidang i-report ro anuman nga insidente it pagpamaeag, harassment, ukon pag-atake pinaagi sa Alisto! Alert Mechanism.
Ro nasambit nga mekanismo sigon hay nagatau it direct channel para sa media professionals agud nga ipaabot ro andang concerns angot sa andang kaeowasan ag seguridad.
Natabu ro insidente samtang nagapungko sa anang rocking chair ag nagatan-aw it TV si Dayang kat barilon it makapilang beses it owa pa nakilaea nga suspek nga nagpaeagiw sakay it motorsiklo.
Padayun pa nga ginatumod ro motibo sa likod it pagpatay, base sa pahayag it Kalibo Municipal Police Station.
