KALIBO, Aklan — Ginakbig eon it pulisya nga case closed ro pagpatay sa sangka 14-anyos nga dalagita sa Barangay Pagsanghan, Banga, Aklan ko Mayo 4 kasunod it boluntaryo nga pagsurender ag pag-aku it anang magueang nga eaeaki sa krimen.
Sa interview it Bombo Radyo, ginpahayag ni P/Senior Master Sergeant Philialyn Navarra it Banga Police Station nga ginatub-eag sigon it anang konsensiya ro suspek nga si Kenny Natabio, 29, residente it nasambit nga lugar rason nga nagsurender agud nga bayaran ro nahimo nga saea sa anang manghud.
Angot kara, kasong homicide ro ginpasaka nga kaso sa suspek it anang mga ginikanan.
Sa panaysayon ni Kenny, matapos sueangon ro anang manghud sa sangka computer shop, ginsabat imaw kara it pabalang rason nga nabunae nana it anang bitbit nga pinutoe nga butong sa ueo ag gin-eu-ok bangud sa anang pagkataranta.
Gin-aywan sigon nana raya sa maligwin nga lugar hasta nga nasapwan eon lang nga nagaka-agnas nga bangkay ko Mayo 6.
Natigayon eon nga maihatud sa anang ulihing paeahuwayan ro biktima ko Huwebes nga adlaw.
