KALIBO, Aklan–Parehong makabulig sa Australia, Amerika ag Pilipinas ro nakataeanang pagpatigayon it kambal nga military exercises nga ginatawag nga Carabaroo ag Dusk Caracha.
Raya ro ginpahayag ni Bombo International Correspondent Denmark Suede it Sydney, Australia.
Tuyo sigon kara nga matapna ro pagkalhit it terorismo kamana man ro paeag it China.
Ginpaathag ni Suede nga ro Carabaroo hay magatutok sa counterterrorism samtang ro Dusk Caracha hay magasanay sa Special Forces Regiment it Philippine army, kaibahan ro First Scout Ranger Regiment, Light Reaction Regiment kaibahan ro andang counterpart nga elite units halin sa Australian Army.
Ro Australia sigon hay ro nagapangunang kaalyado it Pilipinas, kun sa siin ro magtimbang nga nasyon hay may naga eksister Status of Visiting Forces Agreement.
Pagabuligan suno kana it Australian Army ro Philippine Army sa pagsabak sa territorial defense operations.
Mabahoe sigon ro naging bulig it Australia sa natabu nga Marawi siege ko 2017 pinaagi sa ginpagamit nga spy plane para sa operasyon it ground troops kontra sa Islamic State fighters.
Matapos nga mabawi ro Marawi , insigidang nagpatigayon ro Australia it counterterrorism ag urban fighting trainings para sa tropa it nasyon.
Sa uman suno kana nga pagbalik it Carabaroo makaron nga dag-on, ro military training hay pagapasakupan it Philippine Marine Corps, Australian Army ag US Marine Corps.
