KALIBO, Aklan—Temporaryo anay nga ginasuspinde ro mga pagpatigayon it prusisyon bangud sa mga ginapatuman nga safety and health protocol tuga it COVID-19 virus.
Suno kay Reverend Fr. Tudd Belandres it St. John the Baptist Cathedral nga raya hay nakabaehag sa ginpaguwa nga sueundanan it diocese of kalibo makaron nga tiempo it kuwaresma agud nga magiyahan ro andang mga nasakupan tuga it presenteng sitwasyon daea it pandemya.
Bangud nga bawae ro mga pagtipon-tipon it mga tawo, magapatigayon it mobile procession, kun sa siin gina-abisuhan ro mga tumueuo nga magbantay eon lang sa andang natungdan nga mga baeay.
Padayun suno kana ro mga pagselebrar it mga misa apang limitado eamang sa 50 porsiyento it kapasidad it simbahan ro pwedeng makatambong.
May mga kaparian suno kana nga naga-agto sa mga kabaryuhan agud nga magpatigayon it misa sa mga chapel agud nga malikawan ro pagbuhos it mga tawo sa mga simbahan sa banwa.
Mag-eowas kara, magapatigayon man it 7 last words sa Biyernes Santo.
Kada Biyernes man suno kana hay nagapatigayon it via crusis sa sueod it simbahan nga naga-umpisa kada alas-6 it gabi-i.
Kadungan kara, gina-engganyo gihapon ni Fr. Tudd ro tanan nga padayunon ro mga pagpangamuyo kaibahan ro bilog nga pamilya.
Sangka importanteng tiempo suno kana ro Kuwaresma para sa mga Katoliko agud nga ipahaum ro isip, tagipusuon ag kaugalingon sa 40-diyas nga pag-antus, pagkamatay ag uman nga pagkabanhaw ni Hesus para sa sangkatawuhan.
Madumduman nga ko Pebrero 17 ro Ash Wednesday nga senyales it pag-umpisa it Lenten Season.
