KALIBO, Aklan—Gina-asikaso eon ro mga kinahang-eanon nga dokumento para sa ginaproponer nga pagpatindog it bag-ong pasilidad it Aklan District Jail sa pagpanguna nanday provincial administrator Jail Senior Inspector Francis Janagap ag jail warden Jail Inspector Rolyn Malolos.
Suno kay Jail Inspector Malolos nga ro igapatindog nga bag-ong building it Bureau of Jail Management and Penology sa Brgy. Bakhaw Norte, Kalibo hay bilang preparasyon sa cityhood it banwa it Kalibo kun sa siin required nga makaangkon it city jail.
Makabulig man sigon raya agud nga malikawan ro pagdueutdutan it mga nakakulong ukon ro mga ginatawag nga person deprived of liberty (PDL).
Nauna kara, nag-request sigon sanda it eugta kay Kalibo mayor Juris Sucro nga insigida man nana nga gin-aksyunan.
Nagaeaum imaw nga ro eugta nga iga-donate hay magamit sa pagpatindog it sangka moderno nga penal facility sa banwa ag pagapondahan it andang taeatapan.
Samtang, ginkumpirma pa ni Malolos nga imbes nga 1,000 square meter eamang nga eugta ro andang gin-request, ro gintau kanda hay kapin sa 4,000 square meter nga eubus nanda nga ginpasaeamatan agud nga mas haeuga ag kompleto ro pasilidad nga maipatindog partikular sa livelihood ag recreation.
Sa pihak nga parte, ginkumpirma man nana nga plano man nga isaylo sa banwa it Makato ro Aklan district jail bangud nga ro eugta nga ginatindugan kara makaron sa Barangay Nalook, Kalibo hay ginabo-oe eon it Department of Agriculture para sa igabutang nga mga proyekto.
Sa pihak nga parte, gindugang pa ni provincial administrator Jail Senior Inspector Janagap nga pirma eon lang ro kueang ni mayor Sucro.
Apang nag apela pa suno kana ro bag-ong punong barangay it lugar nga makaangkon anay it public forum sa unang domingo it Enero sa ginaproponer nga pagpatindog it jail facility sa andang barangay.