KALIBO, Alan—Bukon it pabor si Malay Sangguniang Bayan member ag Committee on Tourism Chair Nenette Aguirre-Graf sa bag-ong pahayag ni pangueong Rodrigo Duterte nga nagapasugot eon raya nga magpatindog it casino sa isla it boracay bangud nga owa eon it kwarta ro gobyerno.
Suno kay Graf nga ro nasambit nga plano hay kabaliskaran sa katuyuan it gobyerno nga pagpasarado sa isla it Boracay ko 2018 nga makaangkon it maeapnagon nga paglimpyo it mga ilegal nga istraktura ag rehabilitasyon.
Nagpanindugan pa imaw nga indi kinahangean it Boracay ro casino bangud nga naging bantog raya sa bilog nga kalibutan tuga it manami nga beach ag pagiging family destination.
Nagakabaeaka man imaw nga engkaso nga makasueod ro casino hay magaresulta raya sa iba pang mga problema kapareho it prostitusyon, panakawan, illegal nga droga ag iba pa.
Sa pihak nga parte, ginpahayag pa ni Graf nga nagpatuman sanda it moratorium ko 2017 sa pagtukod it bag-ong casino sa boracay agud nga malimitahan ro pagsueod it kaparehong sugae matapos nga may ap-at eon nga presenteng naga operate nga casino sa isla nga nagabaton it mga dumueuong nga turista.
