KALIBO, Aklan — Gin batikos it mga netizens ro plano it sangka higanteng kompaniya nga magpatukod it tulay nga maga konekta sa Caticlan ag Isla it Boracay.
Sangka netizen ro nagpahayag nga ro iga tukod nga tulay ro uman nga maga patay sa pilang informal workers sa isla nga owa pa nakakabangon sa epekto it gina patuman nga Boracay closure ku Abril 26.
Nagkomento ro pilang mga netizen nga indi eon raya matawag nga isla engkasong makaangkon it tulay.
Gina sugid nga ro tulay nga may habang 1.9km hay naga balor it P3-billion ag magatapos ro construction sa sueod it daywang dag-un.
Mataas sigo raya ag posibling maagyan it mga barko sa idaeum.
Suno kay Ramon Ang, presidente it San Miguel Corporation, mabahoe nga bulig ro tulay agud ma-decongest ag malimpiyuhan ro isla.
Base pa sa gin sumiteng unsolicited proposal sa gobyerno, magakita ro kompaniya pinaagi sa toll fees, kun siin gina eaumang mabawi ro andang nagastos pagkataliwan it 12 hasta it 15 anyos.
Nauna dito, gin klaro it Department of Public Works and Highways (DPWH) nga bukon it kaibahan ro tulay sa masterplan it gina himong rehabilitasyon sa isla.
