KALIBO, Aklan—Ginkumpirma ni Engr. Marlon Velez, head it Land Transportation Office ukon LTO-Aklan nga may mandu eon kanda ro national office sa pagpatuman it Child Safety in Motor Vehicle Acts nga magabawae sa mga unga nga may edad 12-anyos panaba nga mag-pungko sa front seat it mga pribadong saeakyan.
Suno kana nga ro nasambit nga laye hay ginpirmahan ni Pangueong Rodrigo Duterte kato pang nagtaliwan nga Pebrero 2019 apang makaron eamang magiging epektibo ro mandatory compliance kara.
Apang pagatutukan anay sigon nanda ro pag estudyo sa laye ag pagtau it impormasyon sa mga motorista antes nga magpatuman it penalidad.
Ginpaathag ni Engr. Velez nga ro mga unga nga indi maka-abot sa gintaeana nga height requirement nga 4’11” hay kinahangean nga maggamit it child restraint system ukon car seat.
Maskin suno kana nga raya hay dugang nga gastos, apang ro car seat hay kinahangean para sa kaeowasan it mga inunga.
Mabahoe suno kana ro maibulig kara engkaso nga makaangkon it aksidente bangud nga malikawan ro pagka-apok it unga sa sueod it saeakyan.
Indi eon sigon nanda iga-require ro car seat kon bastante man ro mga seatbelt it saeakyan.
Bagay suno kana ro car seat sa mga eapsag ag mga toddlers ukon naga-edad it sang dag-on hasta daywang dag-on.
Nagaeaum si Engr. Velez nga makikipagbueuligan ro publiko sa bag-ong laye.
Nasayuran nga ro multa sa maga-eabag sa nasambit nga laye hay naga abot sa 1,000 hasta 5,000 pesos.
